Veksten sprenger lokala på Mjølstadneset

Veksten til MMC First Process gjer at dei treng meir plass ved avdelinga på Mjølstadneset i Herøy.

I desse dagar er dei i full gong med å gjere ferdig eit nytt bygg som skal romme 36 nye kontorplassar og nytt stort lager i kjellaren. Utvidinga er på 950 kvadratmeter og totalt vil bedrifta ha kring 5000 kvadratmeter til disposisjon på staden.

Flyttar snart inn
Tidlegare hadde naboane i Ervik & Sævik og Norwegian Greentech kontorplassar i lokala på industriområdet, men dei er no ute.
– Bygginga har gått radig sidan i fjor sommar og planen er å flytte inn i mars/april. Bygget er no tett og vi jobbar med å sparkle og male. Lageret tek vi i bruk i løpet av månaden, fortel operasjonsdirektør Håvard Remøy i MMC First Process til NETT NO.
Samtidig med nybygginga, får kantina ei totaloppussing, og vil no ha plass til 110 personar.

MMC First Process har avdelingar både på Mjølstadneset, Dignernes i Ålesund og i Haugesund.

Bedrifta har vore mellom dei raskast veksande selskapa i regionen, både når det kjem til omsetning og talet på tilsette. Med 119 personar i arbeid er no avdelinga i Herøy ein av kommunens største arbeidsplassar.

– Vi har vakse voldsomt fort, spesielt innan brønnbåtar og landbasert oppdrett. Vi ser også at det blir vidare vekst framover, og jobbar med fleire store prosjekt, fortel Remøy.

Foto; kjetil haanes. saken publisert på nett.no 

https://nett.no/nyheter/veksten-sprenger-lokala-p%C3%A5-mj%C3%B8lstadneset